Эхийн хөхөнд сүү орох үед хөх томорч, бага зэрэг хүндэрч хөндүүрлэж болно. Мөн хөхөнд сүү орсноор хөх зангирах магадлалтай. Энэ нь ихэвчлэн төрсний дараах 3-5 дахь долоо хоногт тохиолддог. Гэхдээ түүнээс хойших хугацаанд ч тохиолдохыг үгүйсгэхгүй юм. Тиймээс эхийн хөх зангирсан үед ямар арга хэмжээ авах талаар Нийслэлийн эрүүл мэндийн газраас зөвлөмж гаргажээ.
ХӨХНИЙ СҮҮГ СААХ, ХАДГАЛАХ ЗААВАР
- Хөхний сүүг тагтай хуванцар юмуу эсвэл шилэн саванд хадгална. Хөхний сүү хадгалах савыг цэвэрлэх уусмалтай халуун усаар угаагаад сайтар зайлж хатаана.
- Савыг хэтэрхий дүүргэхгүй, хүүхдэд нэг удаад өгөх хэмжээгээр савлаж хадгална.
- Хөхний сүүг хадгалсан он, сар, өдрийг заавал тэмдэглэж байгаарай.
ЗӨВЛӨМЖ:
Хөхний сүү чинь багасаад байна уу?
Эх сүү сайтай байх нь хөхний том жижгээс огт хамаарахгүй. Бас өөрийнх нь ээж нь хэр сүүтэй байснаас хамаардаг гэдэг ч баттай биш. Ердөө л тухайн эхийн биеийн онцлогоос мөн хэр сайн унтаж амарч хэр хангалттай хооллож байгаагаас л шалтгаална.
Хөхний сүү багасахад ээжүүд маань юун түрүүнд угжих гээд байдаг. Эхийн сүүг юугаар ч орлуулшгүй шүү дээ. Угжих гэж яарахаасаа өмнө сүүгээ сайжруулах арга хэмжээ авахыг зөвлөж байна.
- Хамгийн чухал нь хангалттай сайн унтаж амрах. Хүүхдээ унтах үед дагаж унтаад л байх хэрэгтэй.
- Цай, ус, шингэн зүйл хангалттай уух. Жирэмсэн байх хугацаанд биенд хуримтлагдсан тарга төрсний дараа бидний уусан шингэнтэй нэгдэж сүү болдог гэж байгаа. Ус их уулаа гээд сүү амт чанаргүй болно гэж байхгүй.
- Тэжээллэг хоол хүнс хэрэглэх.
- Ядрахгүйг хичээх.
- Эхний саруудад турах гэж огцом дасгал хөдөлгөөн хийхгүй байх. Мэдээж энэ их гэдэс харвингаас салмаар л байгаа. Гэхдээ хүүхэд хөхөндөө цадахгүй байх шиг хэцүү юм байхгүй шүү.
- Эхийн сэтгэл санаа маш чухал. Яанаа сүү маань багасаад байна гээд бодоод байвал багасаад л байна.
- Далайн байцаа, үхэр хонины чанасан гүзээ мөн шар будаатай цай сайн сүү оруулдаг шүү. Гүзээний салат хийж идээрэй.
- Мөн сүү оруулдаг цайнууд байдаг. Бүр болохгүй бол авч хэрэглэж үзээрэй.